ПОЗИТИВНИ ПРИМЕРИ ОД УЧИЛИШНАТА ПРАКСА (5)
Н.А. е дете кое има проблеми со говорот, одењето и моторичките способности.
Поради забавената фина моторика Н.А. оди на прсти, има краткотрајно внимание и намалена концентрација.
Во училиштето најмногу сака да слуша и да одговара усмено.
Н.А. има посебни афинитети за учење англиски јазик.
Наставничката по англиски тоа го негува и развива кај ученикот на редовните часови, но и во дополнителната настава.
ПОЗИТИВНИ ПРИМЕРИ ОД УЧИЛИШНАТА ПРАКСА (4)
З.П. е ученик во шесто одделение. Има проблеми со видот, затоа му е потребно повеќе време за да ги заврши определените активности.
Наставничката секогаш работи и индивидуално со З.П., односно му ги приспособува методите и времето за работа.
На ученикот З.П. повеќе му одговара усмено да одговара, отколку да пишува, бидејќи тоа го прави бавно и нечитко.
Писмените задачи за него се со заокружување, дополнување и поврзување, а не од отворен тип и со пишување.
ПОЗИТИВНИ ПРИМЕРИ ОД УЧИЛИШНАТА ПРАКСА (3)
С.К. заедно со своите другарчиња од прво до четврто одделение учеше во училницата на првиот кат.
Но, кога требаше да продолжи во петто одделение, а наставата се одвиваше во посебни кабинети за математика, хемија, физика, биологија и странски јазик – се појавија и најголемите проблеми.
Родителите сакаа нивните деца да учат во кабинетите, а директорот и наставниците укажуваа дека тоа не е можно и за С.К.
Затоа, одржаа заеднички состанок, на кој се договорија да нема веќе различни мислења и недоразбирања, туку за оние предмети за кои не е неопходна кабинетска настава – таа да се одржува во училницата на приземјето од училиштето, а кога е кабинетската настава учениците да и помогнат на С.К. и таа да ја посетува заедно со нив. Покрупните и посилните момчиња ја носеа С.К. и нејзината количка, а девојчињата пак, торбата, заедно со книгите, тетратките и приборот.
ПОЗИТИВНИ ПРИМЕРИ ОД УЧИЛИШНАТА ПРАКСА (2)
С.К. има церебрална парализа, се движи со туѓа помош.
Седи во првата клупа за да гледа и слуша подобро.
Има потешкотии при пишувањето.
Поради С.К. нејзиното одделение е преместено на приземјето, најблиску до влезната врата на училиштето.
ПОЗИТИВНИ ПРИМЕРИ ОД УЧИЛИШНАТА ПРАКСА (1)
Ученикот Д.П. има оштетување на слухот и носи слушен апарат.
Родителите се определиле да посетува редовно училиште.
Набрзо наставничката забележува дека кога дава инструкции за сите ученици, Д.П. треба посебно да го гледа директно во очи.
На тој начин, преку невербална комуникација, наставничката гледа и знае дали ученикот ја разбрал, или треба да ја повтори задачата за него.
ШТО Е ТУТОР
Зборот тутор е: патрон, покровител, чувар, протектор, бранител, добротвор, ангел…
А, всушност, тоа е лице на кое му е доверена грижата за малолетни, немоќни и слични лица.
Туторите ангажирани во проектот Биди ИН, биди Инклузивен, биди ИНклудиран се грижат за учениците со посебни потреби во основното образование и им помагаат полесно и побрзо да се вклопат во воспитно-образовниот процес, односно непречено и безболно да се подготвуваат и да ја следат наставата.
ШТО Е АУТИЗАМ
Аутизмот се одликува и се препознава преку недоволната или никаква социјална интеракција и комуникација, како и преку ограничените и повторувачки обрасци на однесување.
Кај некои лица аутизмот се манифестира преку нагласено молчење, лупање со рацете или нишање со телото, отсутност и незаинтересираност и ретка и посебна (педантна, речиси идентична и истоветна) комуникација.
Раното откривање на аутизмот (во првата или втората година од животот) може да му помогне на детето да стекне одредени социјални вештини и делумна самостојност.
Втори април е Светски ден на аутизмот, а статистички аутизмот се повеќе се омасовува, па еден до два случаи се појавуваат кај 1.000 лица.
ИНТЕГРАЦИЈАТА И ИНКЛУЗИЈАТА
Интеграцијата е постар процес и на одреден начин и претходеше на инклузијата.
Интеграцијата се однесува на вклучување на учениците главно со помали потешкотии.
По 25 години од интеграциската образовна политика во 1994 година од страна на УНЕСКО е донесена Декларацијата за инклузија, односно правото на секој ученик на образование во редовната настава со еднакви можности.
Значи, за разлика од интеграцијата, инклузијата е многу поширок концепт.
Инклузијата е образование против дискриминацијата на учениците со посебни потреби и нивната сегрегација.
ШТО Е ИНКЛУЗИЈА
Зборот инклузија значи вклучување, опфаќање, односно вклучување на децата со посебни потреби во редовниот предучилишен и училишен систем и прифаќање на нивната различност, така што сите од тоа да имаат полза.
ДЕЦАТА СО АУТИЗАМ
Овие дева имаат потешкотии со воспоставувањето комуникација (вербална и невербална) и социјални односи.
Нивното внимание е краткотрајно и лабилно. Најчесто тие се насочени само кон сопствените потреби. Па, така, прават стереотипни движења, како на пример: трчање во круг, повторување исти движења, играње на ист начин и со исти играчки и слично.
Уште во најраната возраст, треба да им се помогне да ги подобрат и развијат своите социјални, сознајни и говорни способности.
Детето и ученикот со аутизам мораат да имаат чувство на сигурност и доверба кон воспитувачот и наставникот.
Треба активно и директно да се комуницира со едноставни вербални и визуелни информации, а задачите да бидат поделени на кратки и едноставни чекори.
На овој начин, да се воспостави востановен распоред на дневни активности со временска и програмска предвидливост.